საქართველოს პარლამენტის თავმჯდომარე ირაკლი კობახიძე და დეპუტატები, შვილებთან ერთად, ტრადიციული საშობაო ალილოს მსვლელობის მონაწილეებს თბილისში, პარლამენტის სასახლის წინ შეეგებნენ. ალილოს მონაწილეებს პარლამენტის წევრებმა ტკბილეულით სავსე კალათები და საჩუქრები გადასცეს.
ჟურნალისტებთან საუბრისას, ირაკლი კობახიძემ საქართველოს მოსახლეობას შობის დღესასწაული კიდევ ერთხელ მიულოცა.
„მოგილოცავთ შობას, განსაკუთრებით ვულოცავ ბავშვებს. წელს განსაკუთრებულად აღვნიშნავთ შობას. შობასთან ერთად, აღვნიშნავთ პატრიარქის იუბილეს, პატრიარქის აღსაყდრების იუბილეს და გვინდა, რომ ასეთი განსაკუთრებული წელი იყოს ჩვენი ქვეყნისთვის და თითოეული ჩვენგანისთვის“,- განაცხადა საქართველოს პარლამენტის თავმჯდომარემ.
შობის დღესასწაულთან დაკავშირებით, ალილო 14:00 საათზე, ვარდების მოედნიდან დაიწყო და მას, ტრადიციულად, თეატრალიზებული სახე ჰქონდა. მსვლელობა წმინდა სამების საკათედრო ტაძარში დასრულდება.
რამდენიმე წელია, რაც ალილოს მონაწილეებს საკანონმდებლო ხელისუფლების წარმომადგენლები რუსთაველის გამზირზე საჩუქრებით ხვდებიან.
0