Доступно только по Грузински For the sake of viewer convenience, the content is shown below in the alternative language. You may click the link to switch the active language.
დღეს გურიის მხარეში სახელმწიფო რწმუნებულის ზურაბ ნასარაიასა და რეგიონის მუნიციპალიტეტების მერების ერთობლივი ინიციატივით გამოცხადებული წამახალისებელი ფოტოკონკურსის გამარჯვებული გამოვლინდა. კონკურსის მიზანი გურიის ტურისტული ადგილების, ისტორიულ-კულტურული ძეგლებისა და სხვა ღირსშესანიშნაობების პოპულარიზაცია გახლდათ. იგი სკოლის მოსწავლეებისთვის იყო გამოცხადებული. კონკურსში გამარჯვებისთვის საჭირო იყო მონაწილეებს გადაეღოთ შესაბამისი თემატიკის ფოტო, გამოექვეყნებინათ სოციალურ ქსელ facebook-ზე, გაევრცელებინათ და დაეგროვებინათ რაც შეიძლება მეტი მოწონება. ატვირთული ფოტო უნდა ყოფილიყო საჯარო და იდენტიფიცირებისთვის გამოეყენებინათ შემდეგი სამი მონიშვნა: ესგურიაა, ფოტოს ადგილმდებარეობა და სკოლის დასახელება.
კონკურსის გამარჯვებულს – ლანჩხუთის მუნიციპალიტეტის პირველი საჯარო სკოლის მოსწავლეს ქეთა მენაღარიშვილს ორგანიზატორებისგან გადაეცემა სიმბოლური პრიზი. ყველაზე აქტიური მონაწილეები დაჯილდოვდებიან ერთდღიანი შემეცნებითი ხასიათის ექსკურსიით ოზურგეთის მუნიციპალიტეტში; ასევე, გამარჯვებული მოსწავლის კლასისთვის ლანჩხუთის მუნიციპალიტეტის მერია უზრუნველყოფს ექსკურსიის მოწყობას ამავე მუნიციპალიტეტში.