სპეციალური ინვენტარი განსაკუთრებული საჭიროების მქონე პირებს 26 ოქტომბერს, „შეზღუდული შესაძლებლობის მქონე პირთა დახმარების ფონდის“ ეგიდით, რუსთავში მცხოვრებ სამ ბენეფიციარს სამედიცინო ეტლები გადაეცათ. ბენეფიციარებს პირადად სტუმრობდნენ ქვემო ქართლში სახელმწიფო რწმუნებულ-გუბერნატორი პაატა ხიზანაშვილი, ქალაქის მერი დავით ჯიქია და რუსთავის საკრებულოს თავმჯდომარე დავით მაღლაკელიძე. აღსანიშნავია, რომ ქვემო ქართლში სახელმწიფო რწმუნებულ-გუბერნატორის ადმინისტრაციასა და „შეზღუდული შესაძლებლობის მქონე პირთა დახმარების ფონდს“ შორის ურთიერთთანამშრომლობის მემორანდუმი 2015 წლის 1 ოქტომბერს გაფორმდა. მემორანდუმის თანახმად, მხარეები შეთანხმდნენ, რომ მაქსიმალურად შეუწყობენ ხელს შეზღუდული შესაძლებლობის მქონე პირთა საზოგადოებაში აქტიურ ინტეგრაციას. დღევანდელი აქცია ამ მიზნის მიღწევის გზაზე ერთ-ერთი მნიშვნელოვანი ნაბიჯია.