Доступно только по Грузински For the sake of viewer convenience, the content is shown below in the alternative language. You may click the link to switch the active language.
თბილისის მუნიციპალიტეტის საკრებულოს თავმჯდომარე გიორგი ალიბეგაშვილი დედაქალაქის მერიაში ენერგოეფექტურობისა და ელექტრომობილების გამოფენის გახსნას დაესწრო.
ღონისძიებაზე, რომელიც თბილისის მერის მოადგილემ ირაკლი ლექვინაძემ გახსნა, შეკრებილ საზოგადოებას სიტყვით გიორგი ალიბეგაშვილმა და ენერგეტიკის მინისტრის მოადგილემ ილია ელოშვილმაც მიმართეს.
გამოფენაზე, რომელიც მდგრადი ენერგეტიკის კვირეულის ფარგლებში მოეწყო, ენერგოეფექტური ტექნოლოგიები, ელექტრომობილები , ენერგოდამზოგავი მოწყობილობები, სამშენებლო მასალები და ალტერნატიული ენერგიის წყაროები იყო წარმოდგენილი.
მდგრადი ენერგეტიკის კვირეულისადმი მიძღვნილი ღონისძიებები 19-25 ივნისს ევროპის მასშტაბით იმართება, მასში თბილისი ყოველწლიურად იღებს მონაწილეობას და მისი
მიზანი ადგილობრივი მოსახლეობის ინფორმირება, წახალისება და განახლებადი ენერგეტიკისა და ენერგოეფექტური ტექნოლოგიების პოპულარიზაციაში ჩართვაა.
„მდგრადი ენერგეტიკის კვირეული 2017“ მერების შეთანხმების ფარგლებში იმართება და თბილისი მას 2010 წლიდან შეუერთდა.
შეთანხმება ევროკავშირის ფართომასშტაბიანი ინიციატივაა და ის ადგილობრივ და რეგიონულ მთავრობებს აერთიანებს.
შეთანხმების ხელმომწერნი მიზნად 2020 წლისთვის CO2-ის ემისიები მინიმუმ 20%-ით შემცირებას ისახავს, რაც მწვანე ეკოლოგიურად ორიენტირებული ეკონომიკის განვითარებასა და საცხოვრებელი პირობების გაუმჯობესებას გულისხმობს.
ღონისძიებას მერების შეთანხმების კოორდინატორი გიორგი აბულაშვილი, თბილისი მერიის წარმომადგენლები და სხვა მოწვეული სტუმრები ესწრებოდნენ.