Sorry, this entry is only available in ქართული. For the sake of viewer convenience, the content is shown below in the alternative language. You may click the link to switch the active language.
საქართველოს პარლამენტის თავმჯდომარე ირაკლი კობახიძე, თანმხლებ დელეგაციასთან ერთად, კატარში იმყოფება, სადაც საპარლამენტთაშორისო კავშირის (IPU) რიგით 140-ე ასამბლეა გაიხსნა. დოჰაში ვიზიტი საქართველოს პარლამენტის თავმჯდომარემ კატარის ემირთან, შეიხ თემიმ იბნ ჰამედ ალ სანისთან შეხვედრით დაიწყო.
მხარეებმა ქვეყნებს შორის არსებული ურთიერთობა და თანამშრომლობის სხვადასხვა მიმართულებით გააქტიურების პერსპექტივები განიხილეს.ყურადღება სავაჭრო-ეკონომიკური თანამშრომლობის გაღრმავებაზე გამახვილდა. ასამბლეის პირველ სამუშაო დღეს საქართველოს პარლამენტის თავმჯდომარე ასამბლეის წევრი ქვეყნების პარლამენტების თავმჯდომარეებთან ერთად, მაღალი რანგის შეხვედრაში მიიღებს მონაწილეობას.
სპიკერები ორმხრივ და მრავალმხრივ ფორმატებში თანამშრომლობის გაღრმავების, არაღიარების პოლიტიკის განმტკიცების, გლობალურ მშვიდობასა და უსაფრთხოებაში პარლამენტების როლზე, არსებულ გამოწვევებსა და სხვა აქტუალურ საკითხებზე იმსჯელებენ. დოჰაში ვიზიტის ფარგლებში, ირაკლი კობახიძე და დელეგაციის წევრები ორმხრივ შეხვედრებს გამართავენ და ასამბლეის ფარგლებში დაგეგმილ ღონისძიებებში მიიღებენ მონაწილეობას. საქართველოს პარლამენტის დელეგაციის შემადგენლობაში დეპუტატები: მამუკა მდინარაძე, დავით მათიკაშვილი, დავით ბაქრაძე, გიორგი ხატიძე და ივლიანე წულაია, პარლამენტის აპარატის უფროსი გივი მიქანაძე და პარლამენტის თავმჯდომარის კაბინეტის უფროსი, ნიკოლოზ სამხარაძე შედიან.