Доступно только по Грузински For the sake of viewer convenience, the content is shown below in the alternative language. You may click the link to switch the active language.
სოფელ ერგნეთში ინციდენტების პრევენციისა და მათზე რეაგირების მექანიზმის ფარგლებში 80-ე შეხვედრა გაიმართა.
მონაწილეებმა წინა შეხვედრის შემდგომ პერიოდში დაფიქსირებული ინციდენტები, უკანონო დაკავებები და გადაადგილების თავისუფლების საკითხი განიხილეს. შეხვედრაზე ყურადღება გამახვილდა გამყოფ ხაზზე მავთულხლართებისა და სხვა ხელოვნური ბარიერების უკანონოდ აღმართვის საკითხზე. აღინიშნა, რომ ხელოვნური ბარიერები არღვევს ადგილობრივი მოსახლეობის უფლებებს და მათ მნიშვნელოვან ყოველდღიურ პრობლემებს უქმნის.
საქართველოს ცენტრალური ხელისუფლების წარმომადგენლებმა დააყენეს დე ფაქტო სტრუქტურების მიერ ახალგორის მკვიდრის თამარ მეარაყიშვილის შევიწროვების, ცხინვალის იზოლატორში მყოფი გიორგი გიუნაშვილის გათავისუფლების და დავით ბაშარულის გარდაცვალების საქმის გამოძიების საკითხები. მათ ასევე, ყურადღება გაამახვილეს ახალგორის რაიონის სკოლებში ქართულ ენაზე სწავლების შეზღუდვის პრობლემაზე.
ერგნეთში მომდევნო შეხვედრა მიმდინარე წლის 3 ოქტომბერს გაიმართება.
ინციდენტების პრევენციის და მათზე რეაგირების მექანიზმის ფარგლებში მიმდინარე შეხვედრებზე ქართულ მხარეს სახელმწიფო უსაფრთხოების სამსახური და შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი წარმოადგენენ.