Доступно только по Грузински For the sake of viewer convenience, the content is shown below in the alternative language. You may click the link to switch the active language.
გარემოს დაცვისა და სოფლის მეურნეობის მინისტრი ოთარ შამუგია ისრაელის საგანგებო და სრულუფლებიან ელჩს საქართველოში, რან გიდორს შეხვდა. შეხვედრაზე მხარეებმა ქვეყნებს შორის მრავალწლიანი ურთიერთობის მნიშვნელობას გაუსვეს ხაზი და სამომავლო თანამშრომლობის პერსპექტივები განიხილეს. მინისტრმა მადლობა გადაუხადა ისრაელის ელჩს საქართველოში აგრარული სექტორის განვითარების მხარდაჭერისთვის. საუბარი შეეხო ისრაელის განვითარებისა და თანამშრომლობის საერთაშორისო სააგენტოს „მაშავი“ მიერ ქართველი მეწარმეებისთვის საგანმანათლებლო პროგრამების განხორციელების საკითხს. „მაშავის“ პროგრამების ფარგლებში, სოფლის მეურნეობის დარგში დასაქმებულებს, ფერმერებსა და მეწარმეებს საშუალება ეძლევათ, მიიღონ თანამედროვე საჭიროებებზე მორგებული ცოდნა, მათ შორის, ახალი ტექნოლოგიების მიმართულებით. აღინიშნა, რომ საქართველოსთვის მნიშვნელოვანია სოფლის მეურნეობის დარგის განვითარებაში ისრაელის გამოცდილების გაზიარება. შეხვედრის დასასრულს, ოთარ შამუგიამ ისრაელსა და საქართველოს შორის იმპორტ-ექსპორტის მიმართულებით არსებული პოტენციალის ათვისების ტენდენციაზე ისაუბრა და ქვეყნებს შორის სავაჭრო-ეკონომიკური ურთიერთობების გაღრმავების სურვილი გამოთქვა. გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ნინო თანდილაშვილი ესწრებოდა.