Доступно только по Грузински For the sake of viewer convenience, the content is shown below in the alternative language. You may click the link to switch the active language.
კუდ-ის ყოფილ მაღალჩინოსან ზურაბ ჯამალაშვილს ბრალი ოფიციალურად წაუყენეს. ამის შესახებ prof-news-ს ჯამალაშვილის ადვოკატმა, გიორგი ფოფხაძემ განუცხადა.
ადვოკატის ინფორმაციით დაკავებული ბრალს არ აღიარებს.
“ბრალი წაუყენეს საქართველოს სისხლის სამართლის კოდექსის 157-ე მუხლის პირველი ნაწილით. საქმე ეხება ფარულ ჩანაწერებს, კერძოდ კი პირადი ცხოვრების ხელყოფას. ჯერჯერობით პროკურატურასა და დაცვას შორის დოკუმენტების გაცვლა არ მომხდარა, შესაბამისად ჩემთვის უცნობია, როდის გაიმართება სასამართლო”, – განუცხადა prof-news-ს გიორგი ფოფხაძემ.
რაც შეეხება ზურაბ ჯამალაშვილის შვილს, რომელიც წარსულში ძალოვან უწყებაში მუშაობდა და 2 წლის წინ კიბერდანაშაულისთვის იყო დაკავებული, ადვოკატის ინფორმაციით, გამოძიებას მასთან არავითარი პრეტენზიები არ აქვს.
“შვილი მაშინაც იყო ვირუსის ერთ-ერთი შემქმნელი, ასე მოიხსენიებოდა საქმეში. ასე რომ შვილთან ახლანდელი გამოძიება არანაირ კავშირში არ არის. შესაძლოა ვარაუდის დონეზე ჰქონდეთ დაშვებული, თუმცა დოკუმენტების დონეზე ვიცი, რომ შვილთან მიმართებაში პრეტენზია არავის აქვს”, – განაცხადა გიორგი ფოფხაძემ.
არსებული ინფორმაციით, ზურაბ ჯამალაშვილის გარდა ფარული ჩანაწერების გავრცელებასთან დაკავშირებით მთავარმა პროკურატურამ ადვოკატი ირაკლი ფხალაძე დააკავა, თუმცა უწყებაში ოფიციალურ კომენტარს ჯერჯერობით არ აკეთებენ.