Доступно только по Грузински For the sake of viewer convenience, the content is shown below in the alternative language. You may click the link to switch the active language.
რეგიონული განვითარებისა და ინფრასტრუქტურის სამინისტრო აგრძელებს რეგიონებში განსახორციელებელი პროექტების ფონდიდან დაფინანსებული ინფრასტრუქტურული პროექტების მონიტორინგს სხვადასხვა მუნიციპალიტეტში. სამეგრელო-ზემო სვანეთის სახელმწიფო რწმუნებული ალექსანდრე მოწერელია, მოადგილეებთან და რეგიონული განვითრებისა და ინფრასტრუქტურის მინისტრის მოადგილე ილია ბეგიაშვილი მუნიციპალიტეტების წარმომადგენლებთან ერთად ჩხოროწყუში, ზუგდიდში, მარტვილსა და წალენჯიხაში ინფრასტრუქტურული პროექტების მიმდინარეობას ადგილზე გაეცნენ. სამეგრელო-ზემო სვანეთში, რეგიონებში განსახორციელებელი პროექტების ფონდიდან 53 მილიონ ლარამდე პროექტი ფინანსდა. ჯამურად მუნიციპალიტეტებში ხორციელდება 132 პროექტი. მათ შორის: გზების, წყალმომარაგების სისტემების, ბაღების და სკოლების რეაბილიტაცია და ასე შემდეგ.
წალენჯიხის მუნიციპალიტეტში სოფელ ეწერსა და მედანის ადმინისტრაციულ ერთეულში ცენტრალური და ადგილობრივი ხელისუფლების წარმომადგენლებმა მიმდინარე საგზაო ინფრასტრუქტურის მოწყობის სამუშაოები დაათვალიერეს.
ჩხოროწყუში სოფელ ახუთში, (მეორე ახუთი) გზის სარეაბილიტაციო სამუშაოები 3 კმ. მანძილზე ბეტონის საფარით რეგიონული განვითარების ფონდისა და ადგილობრივი ბიუჯეტის თანადაფინანსებით ხორციელდება და პროექტის ბიუჯეტი 2 908 000 ლარს შეადგენს. პროექტის ფარგლებში მდინარე ზანაზე ასევე ეწყობა ნაპირსამაგრი ჯებირები. გზის აღნიშნულ მონაკვეთზე ასფალტის საფარი არასდროს ყოფილა. ხელისუფლების წარმომადგენლები ასევე გაეცნენ ქალაქ ჩხოროწყუში საგანგებო სიტუაციების კოორდინაციისა და გადაუდებელი დახმარების ცენტრის სამშენებლო სამუშაოებს. პროექტის სახელშეკრულებო ღირებულება 213 443 ლარს შეადგენს.
მარტვილის მუნიციპალიტეტში სალხინოს ადმინისტრაციულ ერთეულში ვახას საავტომობილო გზის სარეაბილიტაციო სამუშაოები მიმდინარეობს. პროექტის ფარგლებში დაიგება 2 900 მეტრი ასფალტობეტონის გზა. ასევე მიმდინარეობს ტალერი-ნობულევის საავტომობილო გზის სარეაბილიტაციო სამუშაოები. პროექტის ფარგლებში დაიგება 3 069 მეტრი ასფალტობეტონის გზა.
მარტვილის მუნიციპალიტეტში საავტომობილო გზების სარეაბილიტაციო სამუშაოები საქართველოს რეგიონებში განსახორციელებელი პროექტების ფონდისა და ადგილობრივი მუნიციპალიტეტის დაფინანსებით ხორციელდება. ხელისუფლების წარმომადგენლებმა მარტვილში დიდების მემორიალის ტერიტორიაც დაათვალიერეს. საპროექტო სამუშაოები დასრულებულია და იგეგმება არსებული მემორიალის აღდგენა, სადაც სხვადასხვა ომში დაღუპული მარტვილელების უკვდავსაყოფად მოეწყობა ობელისკი. მემორიალთან ერთად ტერიტორიაზე მოეწყობა სკვერი.