გიორგი გურასპაშვილმა მუნიციპალიტეტში მიმდინარე და დასრულებული ინფრასტრუქტურული პროექტები დაათვალიერა

ხაშურის მუნიციპალიტეტის გამგებელმა გიორგი გურასპაშვილმა გამგეობის ეკონომიკური განვითარების სამსახურის უფროს სერგო ლალიაშვილთან და ინფრასტრუქტურის განყოფილების უფროს გიორგი პაპიაშვილთან ერთად, მუნიციპალიტეტში მიმდინარე და დასრულებული ინფრასტრუქტურული პროექტები დაათვალიერა. კერძოდ, სოფელ ხცისში, მინი სტადიონის მშენებლობა, ალში საბავშვო ბაღის რეაბილიტაციის სამუშაოები, ახალშენში გზის მოხრეშვა-მოშანდაგების სამუშაოები და სოფელ ალში უკვე დასრულებული მოასფალტებული ცენტრალური გზა.
გამგებელი მუნიციპალიტეტის გამგეობის წარმომადგენლებთან ერთად სოფელ სავანისუბანშიც იმყოფებოდა, სადაც ამჟამად გაზიფიცირების სამუშაოები მიმდინარეობს.
სოფელ ხცისში მინი სტადიონის რეაბილიტაციისთვის ადგილობრივი ბიუჯეტიდან 59 244 ლარი გამოიყო, პროექტი მნიშვნელოვანია, რადგან მისი განხორციელება ხელს უწყობს ცხოვრების ჯანსაღი წესის პოპულარიზაციას და დამკვიდრებას. სტადიონის რეაბილიტაცია მიმდინარე წლის სექტემბერში დასრულდება. სოფელ ალში საბავშვო ბაღის რეაბილიტაცია რეგიონული განვითარების ფონდის ფინანსური მხარდაჭერით მიმდინარეობს. ხელშეკრულების ჯამური ღირებულება 212 976 ლარს შეადგენს. პროექტის დასრულება მიმდინარე წლის ნოემბრის დასაწყისშია დაგეგმილი. სააღმზრდელო დაწესებულება ორ ჯგუფზე იქნება გათვლილი და 70 ბავშვის მიღებას შეძლებს.
სოფელ ალში გზის მოასფალტებისთვის 399 000 ლარი გამოიყო, პროექტი უკვე დასრულებულია, რაც უსაფრთხო და კომფორტული გადაადგილებას უზრუნველყოფს. აღსანიშნავია, რომ ალის მოსახლეობამ განსაკუთრებული მადლობა გადაუხადეს გამგებელ გიორგი გურასპაშვილს და მუნიციპალიტეტის გამგეობის წარმომადგენლებს ალში გზის მოასფალტების პროექტის ხარისხიანად განხორციელებისთვის.