ეკა ბესელია მაუწყებლობის კანონპროექტზე არასამთავრობოების მიმართვას ეხმიანება

საქართველოს პარლამენტის იურიდიულ საკითხთა კომიტეტის თავმჯდომარე, ეკა ბესელია მაუწყებლობის კანონპროექტზე არასამთავრობოების მიმართვას ეხმიანება.
“პროფ-ნიუსი” ეკა ბესელიას განცხადების ტექსტს უცვლელად გთავაზობთ.
„მინდა გამოვეხმაურო განცხადებას, რომელიც გუშინ გავრცელდა ექვსი არასამთავრობო ორგანიზაციის სახელით.
2016 წლის 19 დეკემბერს, საზოგადოებრივი მაუწყებლის თანამშრომლების მიერ საქართველოს პარლამენტში წარმოდგენილი იქნა საკანონმდებლო წინადადება (#2377) „მაუწყებლობის შესახებ“ საქართველოს კანონში ცვლილებების შეტანის შესახებ“ საქართველოს კანონის პროექტთან დაკავშირებით.
საქართველოს პარლამენტის იურიდიულ საკითხთა კომიტეტმა 2017 წლის 6 იანვარს კომიტეტის სხდომაზე განიხილა აღნიშნული წინადადება და პრინციპების დონეზე ცნო მიღებულად. იქიდან გამომდინარე, რომ წინადადების ავტორთა მიერ საკომიტეტო განხილვის დროს დასახელებულ იქნა პრაქტიკაში წამოჭრილი კიდევ სხვა ხარვეზები, რაც საჭიროებდა დამატებით ცვლილებებს, კომიტეტმა მიზანშეწონილად მიიჩნია, საზოგადოებრივი მაუწყებლის წარმომადგენელთა და სპეციალისტების ფართო ჩართულობით, სამუშაო ჯგუფის შექმნა. სამუშაო ჯგუფი შეიქმნა 2017 წლის 16 იანვარს და მისი შემადგენლობა 24 წევრით განისაზღვრა.
განისაზღვრა საკითხები, რომელთა ირგვლივ დაიწყო მუშაობა და ვთხოვეთ ყველა მონაწილეს მოეწოდებინა მოსაზრებები და წინადადებები.
დასახელებულ არც ერთ ორგანიზაციას დღემდე არ მოუწოდებია არც ერთი მოსაზრება, წინადადება ან საკითხი ჯგუფისთვის.
სამუშაო ჯგუფმა იმუშავა იმ საკითხებზე, რომელიც დაასახელა პრობლემურად საზოგადოებრივმა მაუწყებელმა, სამეურვეო საბჭოს წევრებმა და მომზადებული პროექტი შეფასებისთვის გადაუგზავნა ევროპის მაუწყებელთა საბჭოს, რომელმაც სრული მხარდაჭერა გამოხატა აღნიშნული ცვლილებების მიმართ და მისი განხორციელება სასარგებლოდ მიიჩნია (დოკუმენტს ხელს აწერს „ევროპის მაუწყებელთა საბჭოს“ დირექტორი ინგრიდ დელტერნე).
სამუშაო ჯგუფის ფარგლებში 2017 წლის 17 ივნისს, საქართველოს პარლამენტის პირველი რესპუბლიკის დარბაზში გამართულ ღია სამუშაო შეხვედრაზე, რომელიც აქტიურად გაშუქდა მედიის მიერ, მოხდა პრინციპების დონეზე მომზადებული პროექტის განხილვა. კომიტეტი ასევე აქტიურად მუშაობდა ევროპის საბჭოს ოფისთან ამ საკითხებზე. გადაწყდა მომზადებული კანონის პროექტის ინიცირების საკითხი და მითითებულ საკითხებზე მუშაობის/მსჯელობის გაგრძელება საპარლამენტო ფორმატში (ღია საკომიტეტო და პლენარულ სხდომებზე).
მომზადებული კანონის პროექტის საბოლოო რედაქცია, დამატებითი შენიშვნებისთვის/რეკომენდაციებისთვის გადაეგზავნა სამუშაო ჯგუფის ყველა წევრსა და დაინტერესებულ პირს. აღნიშნული პროექტი დამატებითი შეფასებისთვის ასევე გადაეგზავნა ევროპის საბჭოს ოფისს საქართველოში.
ამდენად საკითხზე მუშაობა არა დაჩქარებულად არამედ მიმდინარეობს უკვე 6 თვეზე მეტია და სამწუხაროა, რომ ამ არც ერთ ამ ორგანიზაციას რაიმე მოსაზრება და წინადადება ჩვენთვის არ წარმოუდგენია. განცხადება, რომელიც გავრცელდა მათი მხრიდან იყო არაკორექტული, არასწორი, შეცდომაში შემყვანი და ეს მხოლოდ აზიანებს პროცესს.
კომიტეტი ყოველთვის ღიაა თანამშრომლობისთვის ყველა დაინტერესებულ პირთან“, – ნათქვამია განცხადებაში.
აღსანიშნავია, რომ არასამთავრობო ორგანიზაციები საზოგადოებრივი მაუწყებლის შესახებ საკანონმდებლო ცვლილებების ფართო განხილვას ითხოვენ.
არასამთავრობო ორგანიზაციების ინფორმაციით, საქართველოს პარლამენტის იურიდიული კომიტეტი აპირებს „მაუწყებლობის შესახებ“ საქართველოს კანონში ცვლილებების უმოკლეს ვადაში ინიცირებას.
„სამუშაო შეხვედრა, ისევე, როგორც საკანონმდებლო ცვლილებებზე მუშაობის პროცესი, მიუხედავად არაერთი მოთხოვნისა, დაინტერესებული საზოგადოებისა და დარგის სპეციალისტების დიდი ნაწილის მონაწილეობის გარეშე წარიმართა. შემაჯამებელ სამუშაო შეხვედრაში მონაწილეობდა მაუწყებლის მენეჯმენტის დიდი ნაწილი, მაგრამ არ იყო ჩართული სამეურვეო საბჭოს არც ერთი წარმომადგენელი. ამასთან, განხილული ცვლილებების ინიცირება პარლამენტის კომიტეტში დეკლარირებულ ვადაზე უფრო სწრაფად, 20 ივნისს იგეგმება.
წარმოდგენილი პროექტით დაგეგმილი ცვლილებები, არსებითად აუარესებს საზოგადოებრივი მაუწყებლის ანგარიშვალდებულებისა და გამჭვირვალობის სტანდარტს, ზრდის საზოგადოებრივი მაუწყებლის მენეჯმენტის უფლებამოსილებას, ასუსტებს სამეურვეო საბჭოს, აჩენს კორუფციული გარიგებების რისკს, ასუსტებს მაუწყებელში დასაქმებულ პირთა დაცვის მექანიზმებს.
შემოთავაზებული ცვლილებები აკნინებს საზოგადოებრივი მაუწყებლის, როგორც საჯარო სიკეთის, როლს. მათი დაკანონების შემთხვევაში, საზოგადოებრივი მაუწყებელი დაკარგავს თავის პირველად მისიას და იქცევა კომერციულ, საზოგადოებრივი კონტროლისაგან თავისუფალ ტელევიზიად. მიგვაჩნია, რომ დაგეგმილი საკანონმდებლო ცვლილებები საზოგადოებრივ მაუწყებელზე მიმდინარე პროცესის ნაწილია. ვგულისხმობთ, მენეჯმენტის მიერ პოლიტიკურად მნიშვნელოვანი გადაცემების დახურვას და საზოგადოებრივი მაუწყებლის პოლიტიკური სივრცის მხოლოდ შიდა რესურსით მართვის გადაწყვეტილებას.
ზემოაღნიშნულიდან გამომდინარე, ხელმომწერი ორგანიზაციები მოვითხოვთ: შეჩერდეს კანონპროექტის გადაუდებელი ინიცირება პარლამენტში; დაუყოვნებლივ შეიქმნას ფართო და მონაწილეობითი სამუშაო ჯგუფი, კანონპროექტით დაგეგმილ ცვლილებებზე მსჯელობისათვის“, – ნათქვამია განცხადებაში, რომელსაც ხელს აწერენ შემდეგი არასამთავრობო ორგანიზაციები _ ახალგაზრდა იურისტთა ასოციაცია, „საერთაშორისო გამჭვირვალობა“, ადამიანის უფლებების სწავლებისა და მონიტორინგის ცენტრი (EMC), ფონდი „ღია საზოგადოება – საქართველო“, რეგიონულ მაუწყებელთა ასოციაცია, საქართველოს ჟურნალისტური ეთიკის ქარტია, მცირე და საშუალო ტელეკომოპერატორთა ასოციაცია.