Доступно только по Грузински For the sake of viewer convenience, the content is shown below in the alternative language. You may click the link to switch the active language.
მცხეთის მუნიციპალიტეტის სოფელ მუხრანში საბავშვო ბაღების მშენებლობა მიმდინარეობს. ამ დღეებში, მცხეთის მაჟორიტარი დეპუტატი დიმიტრი ხუნდაძე, მცხეთა – მთიანეთის გუბერნატორი ლევან ზაუტაშვილი და ადგილობრივი ხელისუფლების წარმომადგებლები მუხრანს ესტუმრნენ და მშენებარე I საბავშვო ბაღი დაათვალიერეს. მუხრანი საქართველოში მოსახლეობის რაოდენობით ერთ -ერთი დიდი სოფელია, რომელსაც ადგილმდებარეობისა და სკოლამდელი ასაკის ბავშვების რაოდენობის გათვალისწინებით ორი საბავშვო ბაღი ემსახურებოდა. მოძველებული და ამორტიზებული შენობები, სადაც ბავშვები დადიოდნენ, თანამედროვე მოთხოვნებს ვერ აკმაყოფილებდნენ. ამიტომ 2013 წლიდან მუხრანის I საბავშვო ბაღის აღსაზრდელები ქსოვრისის კეთილმოწყობილ საბავშვო ბაღში გადაიყვანეს ახალი ბაღის აშენებამდე, ხოლო მოგვიანებით მუხრანის II საბავშვო ბაღიც შეუერთდა მათ, რადგან 2016 წელს ამ ბაღის რეკონსტრუქცია – რეაბილიტაციაც დაიწყო. ამჟამად მუხრანის II საბავშვო ბაღი დასრულებულია და აღსაზრდელთა ნაკადს ახალი სასწავლო წლიდან მიიღებს. მუხრანის I საბავშვო ბაღი, რომელიც სხვადასხვა ასაკის 6 ჯგუფზეა გათვლილი, მიმდინარე წლის ოქტომბრის ბოლოს დასრულდება. იგი საქართველოში ერთ – ერთი დიდი და ინფრასტრუქტურით გამორჩეული ბაგა-ბაღი იქნება, რომელსაც მუნიციპალური განვითარების ფონდის დაკვეთით და ევროპის საინვესტიციო ბანკის დაფინანსებით შპს ,,დიკა 2010“ აშენებს. მშენებლობის მთლიანი ღირებულება 1 653 676 ლარია. სკოლამდელი ასაკის ბავშვებისთვის 2012 წლიდან მცხეთის მუნიციპალიტეტში სამი ახალი ბაღი აშენდა, თერთმეტ ბაღს ჩაუტარდა რეკონსტრუქცია და კეთილმოეწყობის სამუშაოები. ამჟამად კი მიმდინარეობს მუხრანის I და ნატახტრის ბაღების მშენებლობა.