Sorry, this entry is only available in ქართული. For the sake of viewer convenience, the content is shown below in the alternative language. You may click the link to switch the active language.
მთავარ პროკურატურაში ნაფიც მსაჯულთა სასამართლოს ევროპული სტანდარტების თემაზე პროკურორებისთვის ორდღიანი ტრენინგი ჩატარდა. სწავლების მიზანს ქართველი პროკურორებისთვის საერთაშორისო სტანდარტებისა და ადამიანის უფლებათა ევროპული სასამართლოს პრაქტიკის გაცნობა წარმოადგენდა. სასწავლო პროცესს ევროპის საბჭოს მიერ მოწვეული საერთაშორისო ექსპერტი ჯერემი მაკბრაიდი უძღვებოდა.
ტრენინგის ფარგლებში მონაწილეებმა განიხილეს ნაფიც მსაჯულთა სასამართლოს ევროპული სტანდარტები და ადამიანის უფლებათა ევროპული კონვენციის მე-6 მუხლთან დაკავშირებული საკითხები, მათ შორის: დასაბუთებული განაჩენის აუცილებლობა, საპროცესო შეთანხმება, ირიბი ჩვენება და სხვა თემატური საკითხები. სასწავლო კურსი ინტერაქტიულ ხასიათს ატარებდა და თეორიულ სწავლებასთან ერთად, პრაქტიკულ სავარჯიშოებსაც მოიცავდა.
ტრენინგი საქართველოს პროკურატურისა და ევროპის საბჭოს თანამშრომლობის ფარგლებში, ევროპის საბჭოსა და ევროკავშირის ერთობლივი პროექტის “საქართველოში ადამიანის უფლებათა ევროპული კონვენციის გამოყენება და ეროვნული კანონმდებლობისა და სასამართლო პრაქტიკის შესაბამისობაში მოყვანა ევროპულ სტანდარტებთან” მხარდაჭერით განხორციელდა.
სასწავლო პროცესში, საქართველოს პროკურატურის სხვადასხვა სტრუქტურული ერთეულებიდან და ტერიტორიული ორგანოებიდან, 22-მა პროკურორმა მიიღო მონაწილეობა. ადამიანის უფლებათა დაცვა და სამუშაო პრაქტიკაში საერთაშორისო სტანდარტების დანერგვა, საქართველოს პროკურატურის ერთ-ერთ უმთავრეს პრიორიტეტს წარმოადგენს. აღნიშნული მიმართულებით თანამშრომელთა კვალიფიკაციის ამაღლება მომავალშიც აქტიურად გაგრძელდება.