საქართველოს პრეზიდენტის სასახლეში სარეზერვო ფონდიდან დაფინანსებული პროექტის „აქტიური პანკისი“ დახურვის ცერემონია გაიმართა, რომელსაც პრეზიდენტის ადმინისტრაციის უფროსი გიორგი აბაშიშვილი მრჩევლებთან ერთად ესწრებოდა.
პროექტი საქართველოს პრეზიდენტის სარეზერვო ფონდის მხარდაჭერით სათემო კავშირმა „პანკისის კეთილდღეობისთვის“ განახორციელა და იგი პანკისის 6 სკოლის მე-9, მე-10, მე-11 კლასის მოსწავლეების ჩართულობით მიმდინარეობდა.
პროექტი სამი კომპონენტისგან შედგებოდა: შემეცნებითი ვიქტორინა- რა? სად? როდის?; ესსე სამშობლოს შესახებ და ფერწერული ნამუშევრების კონკურსი.
დღეს სასახლეში გამართულ ღონისძიებას 30 ფინალისტი ბავშვი დაესწრო, რომლებმაც სასახლის ფოიეში საკუთარი ფერწერული ნამუშევრების გამოფენა მოაწყვეს და პრეზიდენტის ადმინისტრაციის უფროსსა და მრჩევლებს კონკურში გამარჯვებული ესსეები გააცნეს.
პროექტის მონაწილეებმა მადლობა გადაუხადეს პრეზიდენტის ადმინისტრაციას და განსაკუთრებით პრეზიდენტის მრჩეველს სოფიო შამანიდს პანკისის ხეობის მცხოვრებლებისათვის გამოჩენილი მნიშვნელოვანი ყურადღებისა და ხეობაში განხორციელებული პროექტებისათვის.
0