საზოგადოებრივი მაუწყებლის გენერალური დირექტორი ვასილ მაღლაფერიძე გახდა

Доступно только по Грузински For the sake of viewer convenience, the content is shown below in the alternative language. You may click the link to switch the active language.

საზოგადოებრივი მაუწყებლის გენერალური დირექტორი ვასილ მაღლაფერიძე გახდა. მეორე ტურის მეორე კენჭისყრით, მაღლაფერიძის კანდიდატურას მხარი სამეურვეო საბჭოს ექვსმა წევრმა დაუჭირა, ხოლო თინათინ ბერძენიშვილის კანდიდატურას – ორმა.
ვასილ მაღლაფერიძე 2014 წლიდან 2016 წლის 31 აგვისტომდე იყო შპს „ჯი-დი-ეს თი-ვი“-ის გადაცემა „2030“-ის გენერალური პროდიუსერი. 2012 წელს ტელეკომპანია „მე-9 არხის“ დირექტორის მოადგილე და გადაცემა „კონსილიუმის“ წამყვანი. 2010-2012 წლებში კი ელექტრონულ ჟურნალ „კალმასობის“ მთავარი რედაქტორი, 2008-2009 წლებში ვასილ მაღლაფერიძე იყო სახალხო დამცველის აპარატში ინფორმაციისა და პოლიტიკის დეპარტამენტის უფროსი. ამასთან, 2005-2008 წლებში ის იყო სახელმწიფო რწმუნებული-გუბერნატორი საქართველოს ადმინისტრაციულ-ტერიტორიულ ერთეულებში (დუშეთის, თიანეთის, მცხეთის, ყაზბეგის მუნიციპალიტეტები). ასევე ის იყო ორი მოწვევის პარლამენტის წევრი (1999-2004 და 2004-2005 წლების).

საზოგადოებრივი მაუწყებლის გენერალური დირექტორობის კონკურსის მსურველთა განცხადებების მიღება 2016 წლის 28 დეკემბერს დასრულდა. საზოგადოებრივი მაუწყებლის გენერალური დირექტორობის ღია კონკურსის მეორე ტურში 14-დან 5 კანდიდატი გადავიდა: თინათინ ბერძენიშვილი, ზაალ ანჯაფარიძე, ვასილ მაღლაფერიძე, ნათია კუპრაშვილი და ნინო ზაუტაშვილი.