სამეცნიერო-კვლევითი დაწესებულებების დირექტორის და სხვა ადმინისტრაციულ თანამდებობაზე ასარჩევად ასაკობრივი შეზღუდვა აღარ იარსებებს. მთავრობამ პარლამენტს “მეცნიერების, ტექნოლოგიებისა და მათი განვითარების შესახებ“ კანონში ცვლილების პროექტი წარუდგინა, რომლის მიხედვით, სამეცნიერო-კვლევითი დაწესებულების დირექტორის თანამდებობასა და სხვა ადმინისტრაციულ თანამდებობაზე 65 წლის ასაკს მიღწეული პირის არჩევის შეზღუდვა უქმდება.
როგორც მთავრობა განმარტავს, ასაკობრივი ბარიერის გაუქმების ინიციატივა განპირობებულია სამეცნიერო-კვლევითი დაწესებულების პერსონალის ასაკობრივი შემადგენლობითა და სპეციფიკით.
“აღნიშნული შეზღუდვის მოხსნა ღვაწლმოსილ მეცნიერებს შესაძლებლობას მისცემს, დაიკავოს დაწესებულების ადმინისტრაციული თანამდებობა“, – ნათქვამია პროექტის განმარტებით ბარათში.
მოქმედი კანონით, სამეცნიერო-კვლევითი დაწესებულების დირექტორად შეიძლება აირჩეს პირი, რომლის ასაკი 65 წელს არ აღემატება. დაწესებულების ადმინისტრაციულ თანამდებობაზე არ შეიძლება აირჩეს ან დაინიშნოს პირი, რომლის ასაკი 65 წელს აღემატება.
სამეცნიერო-კვლევითი დაწესებულებების დირექტორის და სხვა ადმინისტრაციული თანამდებობის დასაკავებლად ასაკობრივი შეზღუდვა უქმდება
24/04/2017