Доступно только по Грузински For the sake of viewer convenience, the content is shown below in the alternative language. You may click the link to switch the active language.
სახელმწიფო უსაფრთხოების სამსახურის ანტიკორუფციული სააგენტოს და სასჯელაღსრულებისა და პრობაციის სამინისტროს გენერალური ინსპექციის თანამშრომლებმა, ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად, სამსახურებრივი მდგომარეობის გამოყენებით დიდი ოდენობით თაღლითობის მცდელობის ფაქტზე სასჯელაღსრულებისა და პრობაციის სამინისტროს პენიტენციური სისტემის რუსთავის N16-ე დაწესებულების ინსპექტორი ნათელა ჯინჭარაძე დააკავეს. გამოძიებამ დაადგინა, რომ ნათელა ჯინჭარაძე მოქალაქეს თავისი ახლობლის, ქ.რუსთავის N17-ე დაწესებულებაში მყოფი პატიმრის ვადაზე ადრე გათავისუფლებაში დახმარებას დაჰპირდა, რის სანაცვლოდაც მოსთხოვა და გამოართვა 7000 აშშ დოლარი, რა დროსაც იგი ბრალდებულის სახით დააკავეს. გამოძიება თაღლითობის მცდელობის ფაქტზე მიმდინარეობს (საქართველოს სსკ-ის 19-180-ე მუხლის მე-3 ნაწილის ,,ა“ და „ბ“ ქვეპუნქტებით, რაც სასჯელის სახით ითვალისწინებს თავისუფლების აღკვეთას ვადით 6-დან 9 წლამდე). გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს. „სასჯელაღსრულებისა და პრობაციის სამინისტროს გენერალურმა ინსპექციამ სახელმწიფო უსაფრთხოების სამსახურის ანტიკორუფციულ სააგენტოსთან თანამშრომლობით, პენიტენციურ სისტემაში აღკვეთა სისხლის სამართლის დანაშაული. სამინისტოს შესაბამისი უწყებები აქტიურად იყვნენ ჩართულნი ოპერატიულ-სამძებრო მოქმედებებში და განახორციელეს ყველა საჭირო ღონისძიება საქმის გახსნის მიზნით. სასჯელაღსრულებისა და პრობაციის სამინისტრო მის სისტემაში დანაშაულის პრევენციის და აღკვეთის მიზნით, სამართალდამცავ სტრუქტურებთან მომავალშიც აქტიურად ითანამშრომლებს,” – განაცხადა სასჯელაღსრულებისა და პრობაციის სამინისტროს გენერალური ინსპექციის უფროსმა ინსპექტორმა ამირან ქართველიშვილმა.