ქვემო ქართლის რეგიონში კიდევ ერთი მნიშვნელოვანი პროექტი დასრულების ეტაპზეა

მარტყოფის პირველ საჯარო სკოლას სრული რეაბილიტაცია ჩაუტარდა.

“ქვემო ქართლის რეგიონში კიდევ ერთი მნიშვნელოვანი პროექტი დასრულების ეტაპზეა. საგანმანათლებლო და სამეცნიერო ინფრასტრუქტურის განვითარების სააგენტოს მიერ განხორციელებული პროექტის შედეგად, ახალი სასწავლო წლიდან მარტყოფის N1 საჯარო სკოლის 633 მოსწავლე და 57 თანამშრომელი სრულიად განახლებული, თანამედროვე სტანდარტების მქონე საგანმანათლებლო სივრცეებით შეძლებს სარგებლობას. მინდა, შეგახსენოთ საქართველოს პრემიერ-მინისტრის ინიციატივით დაწყებული პროექტის შესახებ, რომელიც ქვეყნის მასშტაბით, თითოეულ მუნიციპალიტეტში, სკოლების მშენებლობა-რეაბილიტაციას მოიცავს. აღნიშნული ინფრასტრუქტურული პროექტები მნიშვნელოვანია და ჩვენთვის ერთ-ერთ პრიორიტეტულ საკითხს წარმოადგენს, რომლის შედეგადაც ჩვენი შვილები შეძლებენ თანამედროვე სტანდარტების მქონე საგანმანათლებლო სივრცეებში სრულფასოვანი განათლების მიღებას“ – ქვემო ქართლში სახელმწიფო რწმუნებული გიორგი დოხტურიშვილი.

ქვემო ქართლის რეგიონში ყველა მუნიციპალიტეტში აქტიურად გრძელდება ინფრასტრუქტურული პროექტების განხორციელება. სსიპ საგანმანათლებლო და სამეცნიერო ინფრასტრუქტურის განვითარების სააგენტოს მიერ გარდაბნის მუნიციპალიტეტში სოფელ მარტყოფის პირველი საჯარო სკოლის სრული რეაბილიტაცია დასრულდა და ამჟამად აღჭურვის ღონისძიებები მიმდინარეობს. 1 845 000 ლარზე მეტი ღირებულების სარებილიტაციო სამუშაოები საქართველოში მოქმედი სამშენებლო ნორმებისა და უსაფრთხოების წესების დაცვით, ევროსტანდარტების შესაბამისი, ეკოლოგიურად სუფთა მასალების გამოყენებით განხორციელდა.
პროექტის ფარგლებში:
ჩატარდა ოთხსართულიანი შენობის სახურავის, ფასადისა და ინტერიერის რეაბილიტაცია;
გარემონტდა საკლასო ოთახები, სველი წერტილები, დერეფნები, კიბის უჯრედები, ადმინისტრაციული ნაწილი და ფოიე;
გამოიცვალა კარ-ფანჯარა, განათება და იატაკი;
მოეწყო სახანძრო უსაფრთხოების, გათბობის, წყალ-კანალიზაციის და ელექტრო გაყვანილობის ახალი სისტემა;
ეზოში დაიგო ასფალტის საფარი, რეაბილიტაცია ჩაუტარდა სკოლის ჭიშკარსა და ღობეს, მოეწყო მრავალფუნქციური ღია სპორტული მოედანი;
სკოლა ადაპტირებულია სპეციალური საჭიროების მქონე პირებისთვის.
ახლად რეაბილიტირებული სკოლა რწმუნებულთან ერთად მისმა მოადგილემ, ილია ჯალაღანიამ, გარდაბნის მუნიციპალიტეტის მერმა, დავით კარგარეთელმა, რუსთავისა და გარდაბნის ათი თემის მაჟორიტარ-დეპუტატმა, ირაკლი შატაკიშვილმა და სსიპ საგანმანათლებლო და სამეცნიერო ინფრასტრუქტურის განვითარების სააგენტოს დირექტორმა, ლევან სუხიტაშვილმა მოინახულეს