Sorry, this entry is only available in ქართული. For the sake of viewer convenience, the content is shown below in the alternative language. You may click the link to switch the active language.
პარლამენტის საფინანსო-საბიუჯეტო კომიტეტის სხდომა კამათის ფონზე მიმდინარეობს. კომიტეტის წევრებს “ინდივიდუალური ბინათმშენებლობის წევრთა უფლებების დაცვის ასოციაციის” თავმჯდომარემ იზოლდა ქემოკლიძემ საკანონმდებლო წინადადება გააცნო, რომელიც ბინათმშენებლობების პრობლემებს ეხება. საკითხი 90-იან წლებიდან დაწყებულ და დღემდე გაჩერებულ ბინათმშენებლობებს ეხება. როგორც ქემოკლიძემ განაცხადა, აღნიშნულმა საკითხმა ის დაავადმყოფა და “ოცნების” იმედი აქვს, რომ მათ შეთავაზებას გაიზიარებს.
მას კომიტეტის თავმჯდომარე თამაზ მეჭიაური გამოეხმაურა, რომლის აზრითაც, ფინანსთა სამინისტროს შესაძლებლობა უნდა მიეცეს, ხარჯი დათვალოს და პრობლემის მოგვარების ვადა დაასახელოს.
“ვინაიდან, მოგიწვიეთ, ამიტომ, შანტაჟს მიწყობთ?! – არც შანტაჟის მეშინია და არც სხვა რამის. ეს დადგენილება 1998 წელსაა მიღებული. მას შემდეგ 18 წელი გავიდა. ახლა პასუხს მე მთხოვთ! 1998 წლის შემდეგ სასამართლოში გედავათ. ყველას მაგივრად, მე როგორ გიპასუხებთ? – ვცდილობ, რაღაცით დაგეხმაროთ. თუკი გსურთ, რომ რაღაც ემოციები აჩვენოთ, ეს ასე არ არის. თუ გადაწყვეტა გვინდა, დავსხდეთ, წყნარად ვილაპარაკოთ და იმაზე ვისაუბროთ, რა გამოვა. ვინმეს ვერც მაგრად მოთხოვნით შეაშინებთ. თქვენთან დანაშაული არ მაქვს. 700 კაცით რაც არ უნდა მაშანტაჟოთ, 700 ტანკით ვერ დამაშანტაჟებთ. თქვენ რაც არ უნდა ისაუბროთ, იქამდე ვერ მივალთ, რომ დღესვე ბინები დაგირიგოთ! ქალბატონო, ქვეყანას კიდევ სხვა პრობლემები აქვს და ფინანსთა სამინისტრო მხოლოდ ამაზე ხომ არ იმუშავებს?!”, – მიმართა ბინათმშენებლობის წევრთა უფლებების დაცვის ასოციაციის წევრებს მეჭიაურმა.
კომიტეტის სხდომაზე ფინანსთა სამინისტროს იურიდიული დეპარტამენტის წარმომადგენლებმა სერგო ბირკაძემ სახელმწიფო შიდა ვალის (კოოპერატიული ბინათმშენებლობები) დაფარვის უზრუნველსაყოფად გატარებული ღონისძიებების შესახებ ინფორმაცია წარადგინა.