ანიმაციური ფილმების მე-9 საერთაშორისო ფესტივალი, “ექო-თოფუზი 2017” მცხეთის მუნიციპალიტეტის სოფლებს ციხისძირსა და მისაქციელს ეწვია.
სტუმრებს ანიმატორები ქუჩის მხიარული მსვლელობით შეეგებნენ და “ბარაბან-შოუ” მოუწყვეს.
ფესტივალის ფარგლებში ახალი ქართული ანიმაციური ფილმების კინოჩვენებები შედგა ციხისძირის საბავშვო ბაგა-ბაღის აღსაზრდელებისთვის, სადაც ავტორებმა თავიანთი ფილმები თავად წარუდგინეს პატარებს.
გაიმართა ანიმაციის გასართობ-შემეცნებითი ვორქშოპი მისაქციელის საჯარო სკოლაში, რომელშიც მონაწილეობა ანიმაციისა და ხატვის მოყვარულმა მოსწავლეებმა მიიღეს. ისინი გაეცვნენ ანიმაციური ფილმის წარმოების საბაზისო ეტაპებს და თავადაც ჩაერთნენ პროცესში.
შეგახსენებთ, რომ ,,ექო- თოფუზი2016“ შარშან ნიჩბისის საჯარო სკოლას სტუმრობდა.
პროექტი საქართველოს კულტურისა და ძეგლთა დაცვის სამინისტროს და მცხეთის მუნიციპალიტეტის მხარდაჭერით განხორციელდა .
ანიმაციის განვითარების ფონდი 2007 წელს დაარსდა, რომელსაც საქართველოს 5 რეგიონში გახსნილი აქვს სასწავლო სტუდიები და ყოველწლიურად სხვადასხვა მუნიციპალიტეტში ანალოგიურ ფესტივალებს მართავს.
ფონდის მთავარი მიზანი საქართველოში ანიმაციური ფილმწარმოების განვითარება და შემდეგ მსოფლიოში მისი ინტეგრაციაა.
0